पर्सागढि नगरपालिका लगायत पर्साका ग्रामीण क्षेत्रमा चैते धान बालीमा खैरो फड़के किराको प्रकोप तीव्र रूपमा फैलिन थालेपछि किसान चिन्तित बनेका छन् । धान गजाउने र पसाउने महत्वपूर्ण समयमा किराको आक्रमण बढेपछि खेतमा धानका बोट पहेंलो र रातो देखिन थालेका छन्, जसले उत्पादनमा असर पर्ने डर किसानमा बढाएको छ ।
किसानहरूका अनुसार धान बालीको वृद्धि हुने समयमा फड़के किराको प्रकोप बढ्दै जाँदा बाली नै नष्ट हुने हो कि भन्ने चिन्ता थपिएको छ । पर्सागढि नगरपालिका–३ का किसान कृष्णा बस्नेत ले धान पसाउने बेलामा किराको प्रकोप अत्यधिक बढेको बताउँदै यसले किसानलाई मानसिक तनावमा पारेको बताए ।
“धान बालीमा यति धेरै किरा लागेपछि बाली हुने हो कि नहुने भन्ने चिन्ताले निन्द्रा समेत हराएको छ,” उनले भने ।
पर्सागढि नगरपालिकाको कृषि शाखाका प्राविधिक शिवपुजन महतो ले पछिल्लो समय फड़के किराको समस्या लिएर आउने किसानको संख्या बढेको जानकारी दिए । उनका अनुसार यो किराले धानको बोटको फेदमा बसेर रस चुस्ने भएकाले बोट पहेंलो हुँदै रातो भएर सुक्न थाल्छ ।
उनले प्रकोप नियन्त्रणका लागि खेतमा रहेको पानी ३ देखि ५ दिनसम्म सुकाउने तथा आवश्यक परे रासायनिक विषादी प्रयोग गर्न सकिने सुझाव दिएका छन् । उनका अनुसार “एसिफेट ७५% एसपी २ मिलिलिटर वा बुप्रोफेजिन २५% एससी १.५ मिलिलिटर” को मात्रा प्रयोग गरी एक–एक हप्ताको अन्तरमा बोटको माथिबाट नभई फेदमा लक्षित गरेर छर्नुपर्छ ।
खैरो फड़के किराको प्रकोप सखुवाप्रसौनी गाउँपालिका, पटेर्वासुगौली गाउँपालिका, जिराभवानी गाउँपालिका र बहुदरमाई नगरपालिका लगायत क्षेत्रमा पनि फैलिएको किसानहरूले बताएका छन् ।
प्रकोप बढ्दै जाँदा समयमै नियन्त्रणका उपाय अपनाउन कृषि प्राविधिकहरूले किसानलाई आग्रह गरेका छन् ।
टिप्पणी