“हिजो ‘घण्टिवाली’ भन्थे, आज मधेश क्लिन स्विप गरेर देखायौँ” — तुलसा पौडेल

सुनिल श्रेष्ठ / 
पर्सा — कहिल्यै व्यंग्य र उपहासको पात्र बनेको राष्ट्रिय स्वतन्त्र पार्टी (रास्वपा) आज मधेशको राजनीतिमा शक्तिशाली उपस्थितिका रूपमा देखिन थालेको दाबी गरिएको छ। पर्साका कार्यवाहक सभापति तुलसा पौडेलले पार्टीको सुरुवाती दिनहरू सम्झिँदै अहिलेको अवस्थालाई “जनताको विश्वासले दिएको ऐतिहासिक जवाफ” बताएका छन्।

पौडेलका अनुसार रास्वपाले मधेश क्षेत्रमा आफ्नो संगठन विस्तार गर्न थालेका प्रारम्भिक दिनहरू सजिला थिएनन्। गाउँ–गाउँ पुगेर प्रचार गर्दा कार्यकर्तालाई विभिन्न टिप्पणी र व्यंग्य सहनु परेको उनले बताए।
“त्यो बेला हामीलाई ‘घण्टिवाली’ भनेर हाँसिन्थ्यो, मजाक बनाइन्थ्यो,” उनले स्मरण गरे। “तर आज परिस्थिति बदलिएको छ। मधेशमै हामीले क्लिन स्विप गरेर देखायौँ भन्ने आत्मविश्वास आएको छ।”

उनले भने, रास्वपाको चुनाव चिन्ह घण्टी भएकै कारण विरोधीहरूले कार्यकर्तालाई ‘घण्टिवाली’ भनेर सम्बोधन गर्ने गर्थे। तर त्यो उपहासले पार्टीका कार्यकर्तालाई झन् थप हौसला दिएको पौडेलको भनाइ छ।

“हामीले अपमान होइन, चुनौतीको रूपमा लियौँ,” उनले भने, “र आज जनताको मतले देखाइदिएको छ कि परिवर्तनको चाहना कति बलियो छ।” पौडेलले मधेशमा लामो समयदेखि स्थापित दलहरूले जनताको अपेक्षा पूरा गर्न नसकेको आरोप लगाए। यही असन्तुष्टिले नयाँ राजनीतिक शक्तिलाई अवसर दिएको उनले बताए।

“मधेशका युवाहरू, किसान, मजदुर र व्यवसायी सबै परिवर्तन चाहिरहेका थिए,” उनले भने, “त्यसैले रास्वपा आज यहाँ बलियो भएर उभिएको छ।”
उनका अनुसार पार्टीले मधेशका मुद्दालाई प्राथमिकतामा राखेर काम गर्ने योजना बनाएको छ। शिक्षा, स्वास्थ्य, रोजगारी र सुशासनका विषयलाई केन्द्रमा राखेर अघि बढ्ने उनले बताए।

“हामीलाई जनताले दिएको विश्वासलाई परिणाममा बदल्नु हाम्रो जिम्मेवारी हो,” पौडेलले भने, “यो केवल चुनावी जितको कुरा होइन, मधेशको भविष्य बदल्ने अभियान हो।” पौडेलले पार्टीका कार्यकर्ता र समर्थकको निरन्तर मेहनतले आजको अवस्था सम्भव भएको उल्लेख गरे। उनले भने, “हामीलाई उपहास गर्नेहरू धेरै थिए, तर साथ दिनेहरू झन् धेरै रहेछन्। जनताको साथ नै हाम्रो सबैभन्दा ठूलो शक्ति हो।”

उनले आगामी दिनमा रास्वपा मधेशमा अझ संगठित र सक्रिय हुने दाबी गर्दै भने, “हिजो हामीलाई ‘घण्टिवाली’ भनेर हाँस्नेहरू थिए, आज त्यही घण्टीको आवाजले मधेशको राजनीति नै हल्लिएको छ।”

पौडेलले अन्त्यमा भने, “यो सुरुवात मात्र हो। मधेशमा परिवर्तनको घण्टी बजिसकेको छ, अब यसलाई रोक्न कसैले सक्दैन।”